There are no Keywords that match this search
There are no Danish Keywords that match this search
There are no German Keywords that match this search
There are no Icelandic Keywords that match this search
There are no Place Mentioned that match this search
There are no Narrator Gender that match this search
In pleachgeest is in soart fan nachtmerje. Heit wenne as boerefeint by Piter Algra. Hy slepte yn 't bûthús. Dêr stienen fjouwer hynders op 'e stâl. Ien fan dy hynders hie altyd lêst fan in nachtmerje. Op in nacht makke dat hynder sa'n leven dat heit woarde der wekker fan. Heit gong der ôf en stuts de lantearne oan. It hynder wie dweiltrochwiet fan swit. Sa krap hie er it hawn. De nachtmerje wie yn 't rib weiwoarn. Heit seach der noch krekt in glimp fan. Mar it hynder seach de nachtmerje tige skoan. Dy syn egen wiene stiif rjochte op it rib.
Nachtmerjes kinne moai sjonge, fral as se oer 't wetter farre. Fan 'e sawn op elkoar folgjende dochters is ien in nachtmerje. Binne der sawn opelkoarfolgjende jonges, dan is der in wjerwolf by.
In pear jongebazen kamen op in joune let in boerehûs foarby. Doe hearden se dêr gâns lawaei yn 'e hynstestâl. Se tochten: hwat mei dat wêze. Hja dêr hinne en doe seagen se in frommes op in hynder. It wie in nachtmerje. De iene jonge waerd binaud en gong fuort. Mar de oare bleau stean en woe sjen hwat dêr gebeurde. Doe't de nachtmerje him gewaer woarde, fleach se mei 't hynder troch de muorre hinne. Har earmtakken hie de jonge lêst sjoen en dêr wienen de printen noch fan op 'e muorre to sjen.
Fan 'e 7 jonges is ien in wjerwolf.
Fan 'e 7 famkes is ien in nachtmerje.
In wjerwolf is ien dy't net sêd kin, dy mat altyd frette.
In nachtmerje komt faek by hynders. Dan flechtet hja mei de moanjes om, dy reitsje faek yn 'e tiis. Se ride op hynders en noch leaver op fôlen. Se kinne troch de lytste gatsjes komme en geane faek troch it kaeisgat.
Men mat der om tinke de toffels mei de hakken nei 't bêd keard del to setten, oars geane se dêr yn.
Heit hat wol us in nachtmerje op 'e bealch hawn. It frommes gong him op it boarst sitten sa dat de siken him bisetten. Sa'n frommes lit har pânse thús.
Om nachtmerjes to kearen moest men de iene klomp in hiel ein fan de oare ôf ha of de klompen efterstefoar foar de drompel sette.
Froeger gong ús famylje faek to meanen nei de Earnewarren.
Op in simmer wie pake Tamme mei twa fan syn jonges Binne en Jelle dêr yn 'e blaugerzen by de Krúswetters.
Jelle hie even nei hûs west om hwat op to heljen en kaem de oare moarns bitiid werom.
"Hoe is 't hjir?" frege Jelle-om.
"Wol goed, jonge," sei Binne-om, "mar 't wurdt mei de âld man minder. Hwant dy praet de hiele moarn mar oer Simens Bintsje (de frou fan Simen Bergsma). Hy biweart mar dat dy fannacht stoarn is. Hy hie it stjerren meimakke."
Doe sei Jelle-om: "De âld man hat it by 't rjochte ein. Bintsje is fannacht overleden, ik ha 't nyskes krekt heard."
