[2021] nicht grugen
Dor wirn mal ens drei Handwerksburschen in' Krog, de vertellten sich wat von Grugen u. Späukgeschichten. As dit ok en von de Handwerkslüd hüren ded un seg dat se all glik bang wirn, säd he: “He fürcht sich vörn Deuwel nich, väl weniger irst vör Späuk“. As he denn noch ümmer so grotschnudig ded, säd en tau em, he süll mal na'n Torm gahn un dor en Gabel in en Sarg stecken, wurin grad den sülwen Dag en Snurrer rinlegt wir. Gesegt‚ gedahn, he deiht't ok. As de annern öwer all noch luren un luren, dat he werrer kamen süll, säd de en: “Wi will doch mal tausehn, wur he afblewen is“. Twe Kirls föten denn ok en Hart un güngen hen na'n Torm. Dor fün' se em denn ok , öwer dorig. He had nämlich sin Rockslipp mit fast stecken un wir vör Schreck wol daut blewen.
