Dataset extent
[1294] Eulenspiegel und das Butterfass
Ein oll Fru stünn an'n Botterfatt un bottert, seg äwer
hellschen verdreitlich ut, doa kehm Uhlenspeigel un frög ehr,
worüm sei so trurig utseg. "O, seggt sei, ick kann kein
Botter kriegen un heww all stundenlang bottert." "Na, seggt
Uhlenspeigel, doa will ick di woll tau verhelpen, geh man hen
un hal Water ut dat Waterlook, äwe irst sett mi'n beten Früh-
stück up, denn ick bün hungrig." Dat deit dei Ollsch, un as
sei weg is, lockt Uhlenspeigel sick den Kater ran, dei in dei
Stuw sitt, smitt em in dat Botterfatt un pumpelt em unner bet
hei dod is. As dei Fru wedder kümmt, gütt hei dat Water, dat
sei bringt, in dat Botterfatt, pumpelt ein pormal tau un
seggt:"So, Mutter, wat di hüt passiert is, sall di in'n Leben
nich wedder passieren. Nu hett sick dei Botter all sett, nu
stell di man hen an'n Uhrt, wo di keiner ankamen kann, un
denn botter noch ne halw Stunn ümmer sachterweg, un wenn ein
kümmt, denn lat em nich rin, blot wenn din Mann kümmt, denn
vertell em dei Sak, lat em äwe ok nich rin un segg ümmer vör
di hen:"Ick botter minen Kater in dreierlei Water." Uhlenspei-
gel geit af un dei Olsch bottert ehr Tid ut, un as dat Botter-
fatt dunn apen kriggt, dunn hadd sei dei Bescherung:nicks as
Kattenhor un den dodigen Kater.